Laurdag 19. juni opnar ny utstilling i Kunstnarhuset Messen i Ålvik.
 
Denne gongen er det Synneva Heradstveit som viser sine akvarellar. Ho er ein av få kunstnarar i Norge som har gjort akvarellen til sitt kunstnarlege språk.
 
Synneva bur i Bergen, men vaks opp på Heradstveit i Tørvikbygd og har sterke røter til Kvam og Hardanger.
 
Kunstutdanninga tok ho i Bergen på Kunsthåndverksskolen og på Vestlandets Kunstakademi, og har delteke på mange utstillingar og heldt separatutstillingar i løpet av karreiera.

Utstillinga ho viser i Ålvik i sommar har fått tittelen KVARDAGAR. Akvarellane skildrar stemningar, årstider, naturen og ljoset rundt oss i dei store fargeflatene.
 
Synneva kallar bileta sine for ”tidlause landskap” og seier vidare om arbeidet sitt:
 
”Eg arbeider med akvarell i eit minimalistisk formspråk, mellom det kvasse og det flytande, lag på lag, farge på farge. Uttrykket baserar seg på landskapsobservasjon og naturminner. Eg arbeider gjerne i seriar, og er opptatt av at fargen i seg sjølv kan gje rom for assosiasjonar og individuell tolking”
 
Utstillinga er ope på laurdagar.
 
For dei som vil læra å male akvarell er det mogleg å melde seg på kurs i veke 26.